جب موت واقع ہونے کا خدشہ لاحق ہو جائے تو اسلام میں حرام اشیاء کو کھا لینا بھی جائز قرار دیا گیا ہے

www.swatsmn.com
دبئی(مانیٹرنگ ڈیسک) بھوک کے باعث جب موت واقع ہونے کا خدشہ لاحق ہو جائے تو اسلام میں حرام اشیاء کو کھا لینا بھی جائز قرار دیا گیا ہے۔ اسی حکم کے تحت جب کسی خاتون کی زندگی کا سوال ہو تو اس وقت محرم اور نامحرم کی بحث بھی بے کار ہو جاتی ہے۔ لیکن دبئی میں ایک ایشیائی باپ نے ’’نامحرم‘‘ ریسکیو ورکرز کے ہاتھوں بیٹی کو بچائے جانے کی بجائے اس کے سمندر میں ڈوب کر جاں بحق ہونے جانے کو ترجیح دی۔
ایک ایشیائی شخص اپنے بیوی بچوں کے ہمراہ ساحل سمندر پر پکنک منانے کے لیے گیا۔ اس کے بچے سمندر میں نہا رہے تھے کہ اس دوران اس کی 20سالہ بیٹی تیز لہر کی نذر ہو گئی اور ڈوبنے لگی۔ لڑکی نے مدد کے لیے آواز دی۔ پاس ہی 2ریسکیوورکرز موجود تھے، وہ تیزی کے ساتھ لڑکی کو بچانے کے لیے آئے لیکن لڑکی کا باپ ان کے سامنے کھڑا ہو گیا اور انہیں کہا کہ وہ کسی نامحرم کو اپنی بیٹی کو ہاتھ نہیں لگانے دے گا۔ 
دبئی پولیس کے سرچ اینڈ ریسکیو ڈیپارٹمنٹ کے ڈپٹی ڈائریکٹر لیفٹننٹ کرنل احمد برقیباح کا کہنا ہے کہ لڑکی کا باپ خاصا طاقتور آدمی تھا، دونوں ریسکیوورکرز کی اس کے سامنے ایک نہ چلی اور اس دوران لڑکی ڈوب کر جاں بحق ہو گئی۔ انہوں نے کہا کہ یہ واقعہ ان چند واقعات میں سے ایک ہے جنہیں میں زندگی بھر نہیں بھلا پاؤں گا۔ بعد ازاں ریسکیوورکرز کو روکنے اور ان کے کام میں مداخلت کرنے پر لڑکی کے والد کو گرفتار کرکے اس کے خلاف مقدمہ درج کرلیا گیا۔