موت ہو تو ایسی کہ تاریخ رقم ہو۔۔۔۔ برٹش پاکستانی خاتون بشریٰ فاروقی

بیرون ملک مقیم وہ پاکستانی خاتون جس کی عرب ریاست میں موت پورے پاکستانی گاؤں کو افسردہ کر گئی

بئی سٹی (مانیٹرنگ ڈیسک) دبئی سے تعلق رکھنے والی برٹش پاکستانی خاتون بشریٰ فاروقی کی کوہ پیمائی کے دوران موت نے پاکستان کے شمالی علاقہ جات کے ایک گاؤں کے ہر باشندے کو سوگوار کردیا ہے۔

نیوز سائٹ thenational.ae کے مطابق بشریٰ فاروقی دیگر کوہ پیماؤں کے ساتھ ایک عمانی وادی میں مہم جوئی کررہی تھیں کہ حادثے کی شکار ہوگئیں۔ ان کی لاش ایک عمانی ہیلی کاپٹر کے ذریعے اگلے روز جائے حادثہ سے نکالی گئی۔
بلتستان میں واقع سدپارہ گاؤں کے باسیوں کو جب یہ خبر ملی تو ان پر غم کے پہاڑ ٹوٹ پڑے۔ اس گاؤں میں بشریٰ فاروقی کو نہایت احترام اور محبت کی نظر سے دیکھا جاتا تھا کیونکہ انہوں نے یہاں کے بچوں کو تعلیم سے مال مال کرنے کیلئے بے مثال کوششیں اور مدد کی تھی۔ انہوں نے دور دراز پہاڑی گاؤں میں بچیوں کی تعلیم کا آغاز کیا اور بعدازاں سدپارہ کے 140 اور دیگر قریبی دیہاتوں کی 360 لڑکیوں کی تعلیم کا اہتمام کیا۔ انہوں نے ایک تنظیم قائم کی اور بیرون ملک سے فنڈ اکٹھے کرکے شمالی علاقہ جات کے بچوں کی تعلیم پر خرچ کئے۔
ان کی تنظیم Inspire Initiative کے جنرل منیجر غلام محمد نے بتایا ’’جب مجھے ان کی وفات کی خبر ملی تو میں رو پڑا۔ وہ ہمارے خاندان کے فرد کی طرح تھیں۔‘‘ سدپارہ کے بچے انہیں اپنی ماں کی طرح سمجھتے تھے اور ان کی دنیا سے رخصتی پر شدید غمزدہ ہیں۔ آج(بدھ) بچوں نے بڑی تعداد میں جمع ہوکر ان کیلئے دعائے مغفرت بھی کی۔